zaKHm bhar jaenge lekin ek nishan rah jaega

zaḳhm bhar jā.eñge lekin ik nishāñ rah jā.egā

kuchh bhī ho pahle kī tarah dil kahāñ rah jā.egā

tum chale jāoge lekin mere siine meñ sadā

raakh meñ lipTā huā ātish-fishāñ rah jā.egā

aañkh se meghā baras kar aap hī tham jā.egī

ghuT ke siine meñ kuchh aahoñ kā dhuāñ rah jā.egā

khīñch kar ruuh vaqt-e-ruḳhsat saath tum le jāoge

qaid meñ sāñsoñ kī qalb-e-nā-tavāñ rah jā.egā

ābla-pā.ī kā hāsil nā-murādī gar rahā

ārzūoñ kā bhaTak kar kārvāñ rah jā.egā

qabr par sham.a jalā kar tū mirī ruḳhsat huā

hashr tak rone ko mujh pe āsmāñ rah jā.egā

bijliyoñ kī nazr ho jā.egā dil kā āshiyāñ

sochtā huuñ kyā vo phir be-ḳhānumāñ rah jā.egā

luuT kar gul kā tabassum gar huī ruḳhsat ḳhizāñ

'zebā' ibrat ke liye phir gulsitāñ rah jā.egā

zaKHm bhar jaenge lekin ek nishan rah jaega

kuchh bhi ho pahle ki tarah dil kahan rah jaega

tum chale jaoge lekin mere sine mein sada

rakh mein lipTa hua aatish-fishan rah jaega

aankh se megha baras kar aap hi tham jaegi

ghuT ke sine mein kuchh aahon ka dhuan rah jaega

khinch kar ruh waqt-e-ruKHsat sath tum le jaoge

qaid mein sanson ki qalb-e-na-tawan rah jaega

aabla-pai ka hasil na-muradi gar raha

aarzuon ka bhaTak kar karwan rah jaega

qabr par shama jala kar tu meri ruKHsat hua

hashr tak rone ko mujh pe aasman rah jaega

bijliyon ki nazr ho jaega dil ka aashiyan

sochta hun kya wo phir be-KHanuman rah jaega

luT kar gul ka tabassum gar hui ruKHsat KHizan

'zeba' ibrat ke liye phir gulsitan rah jaega