zaKHm dekhe na mere zaKHm ki shiddat dekhe

zaḳhm dekhe na mire zaḳhm kī shiddat dekhe

dekhne vaalā mirī āñkhoñ kī hairat dekhe

mujh pe āsāñ hai kahe lafz kā iifā karnā

us ko mushkil hai to vo apnī suhūlat dekhe

dil liye jaatā hai phir kū-e-malāmat kī taraf

aañkh ko chāhiye phir ḳhvāb-e-hazīmat dekhe

koī sūrat ho ki inkār se pahle aa kar

kis qadar us kī yahāñ par hai zarūrat dekhe

dil tazabzub meñ hī rahtā hai ba-vaqt-e-paimāñ

lafz dekhe ki ruḳh-e-yār kī rañgat dekhe

aañkh bhar jaatī hai is kasrat-e-nazzāra se

dil to har shakl meñ bas ek shabāhat dekhe

zaKHm dekhe na mere zaKHm ki shiddat dekhe

dekhne wala meri aankhon ki hairat dekhe

mujh pe aasan hai kahe lafz ka ifa karna

us ko mushkil hai to wo apni suhulat dekhe

dil liye jata hai phir ku-e-malamat ki taraf

aankh ko chahiye phir KHwab-e-hazimat dekhe

koi surat ho ki inkar se pahle aa kar

kis qadar us ki yahan par hai zarurat dekhe

dil tazabzub mein hi rahta hai ba-waqt-e-paiman

lafz dekhe ki ruKH-e-yar ki rangat dekhe

aankh bhar jati hai is kasrat-e-nazzara se

dil to har shakl mein bas ek shabahat dekhe