zaKHm dete jaen lekin fikr-e-marham bhi karen

zaḳhm dete jaa.eñ lekin fikr-e-marham bhī kareñ

dard jab had se sivā ho jaa.e to kam bhī kareñ

ham se uljhoge to pachhtānā paḌegā ek din

darguzar jazbāt ko tum bhī karo ham bhī kareñ

kāTte haiñ raat din chakkar tire kūche kā ham

tujh se fursat paa.eñ to phir sair-e-‘ālam bhī kareñ

hijr kī shab meñ tire ḳhat ko paḌhā karte haiñ ham

niiñd aa.e to diye kī lau ko maddham bhī kareñ

apne dar par ham ko bulvāyā ġhanīmat hai yahī

ye zarūrī to nahīñ vo ḳhair-maqdam bhī kareñ

maut kī taklīf se bad-tar hai ranj-e-intizār

pāsdārī vaqt kī tum bhī karo ham bhī kareñ

'āshiqān-e-zulf-e-jānāñ ke 'ajab atvār haiñ

ḳhud giraftār-e-balā hoñ ḳhvāhish-e-ram bhī kareñ

apnā miTTī kā piyāla ham ko pyārā hai bahut

ham na deñge pesh agar vo sāġhar-e-jam bhī kareñ

us kī apnī soch hai ye us kā apnā zarf hai

be-vaqūfī kar rahā hai vo to kyā ham bhī kareñ

jaao ham ko aisī sardārī nahīñ karnī 'shakīl'

tā'ziya bhī ham banā.eñ aur mātam bhī kareñ

zaKHm dete jaen lekin fikr-e-marham bhi karen

dard jab had se siwa ho jae to kam bhi karen

hum se uljhoge to pachhtana paDega ek din

darguzar jazbaat ko tum bhi karo hum bhi karen

kaTte hain raat din chakkar tere kuche ka hum

tujh se fursat paen to phir sair-e-‘alam bhi karen

hijr ki shab mein tere KHat ko paDha karte hain hum

nind aae to diye ki lau ko maddham bhi karen

apne dar par hum ko bulwaya ghanimat hai yahi

ye zaruri to nahin wo KHair-maqdam bhi karen

maut ki taklif se bad-tar hai ranj-e-intizar

pasdari waqt ki tum bhi karo hum bhi karen

'ashiqan-e-zulf-e-jaanan ke 'ajab atwar hain

KHud giraftar-e-bala hon KHwahish-e-ram bhi karen

apna miTTi ka piyala hum ko pyara hai bahut

hum na denge pesh agar wo saghar-e-jam bhi karen

us ki apni soch hai ye us ka apna zarf hai

be-waqufi kar raha hai wo to kya hum bhi karen

jao hum ko aisi sardari nahin karni 'shakil'

ta'ziya bhi hum banaen aur matam bhi karen