zaKHm dil par laga nahin hota

zaḳhm dil par lagā nahīñ hotā

haal aisā huā nahīñ hotā

zikr-e-jānāñ huā nahīñ hotā

zaḳhm-e-dil phir harā nahīñ hotā

chain se zindagī basar hotī

rog dil kā lagā nahīñ hotā

kuchh na kuchh baat ho ga.ī varna

dilrubā bevafā nahīñ hotā

uns iḳhlās aur vafādārī

dil meñ shā.ir ke kyā nahīñ hotā

dasht-o-sahrā meñ gar nahīñ phirte

paañv meñ aabla nahīñ hotā

tum se shikva hai bevafā.ī kā

sab se to ye gila nahīñ hotā

zulm baḌhtā hai roz zālim kā

ḳhatm ye silsila nahīñ hotā

chaar āñkheñ nahīñ huī hotīñ

pyaar kā hādisa nahīñ hotā

yaad aatī na ham ko jānāñ kī

jaam ġham kā bharā nahīñ hotā

adl ke beach koī haa.il hai

kyoñ koī faisla nahīñ hotā

kahkashāñ chāñd titliyāñ jugnū

zikr-e-jānāñ meñ kyā nahīñ hotā

rab ko be-shak pukārte haiñ ham

jab koī aasrā nahīñ hotā

haar jaatā huuñ maiñ anā se 'zakī'

sar ye kyoñ ma.arka nahīñ hotā

zaKHm dil par laga nahin hota

haal aisa hua nahin hota

zikr-e-jaanan hua nahin hota

zaKHm-e-dil phir hara nahin hota

chain se zindagi basar hoti

rog dil ka laga nahin hota

kuchh na kuchh baat ho gai warna

dilruba bewafa nahin hota

uns iKHlas aur wafadari

dil mein shair ke kya nahin hota

dasht-o-sahra mein gar nahin phirte

panw mein aabla nahin hota

tum se shikwa hai bewafai ka

sab se to ye gila nahin hota

zulm baDhta hai roz zalim ka

KHatm ye silsila nahin hota

chaar aankhen nahin hui hotin

pyar ka hadisa nahin hota

yaad aati na hum ko jaanan ki

jam gham ka bhara nahin hota

adl ke beach koi hail hai

kyon koi faisla nahin hota

kahkashan chand titliyan jugnu

zikr-e-jaanan mein kya nahin hota

rab ko be-shak pukarte hain hum

jab koi aasra nahin hota

haar jata hun main ana se 'zaki'

sar ye kyon marka nahin hota