zaKHm-e-dil ka ho mudawa mujhe manzur nahin

zaḳhm-e-dil kā ho mudāvā mujhe manzūr nahīñ

ziist kā merī sahārā hai ye nāsūr nahīñ

māñgtā huuñ maiñ tujhe tujh se nayā hai ye savāl

baat rad karnā gadā kī terā dastūr nahīñ

aap aa jaa.eñ dam-e-naz.a mujhe lene ko

aap kī shān-e-karam se to ye kuchh duur nahīñ

aish ke sab hī haiñ sāmān mayassar lekin

merā saaqī nahīñ vo bāda-e-maḳhmūr nahīñ

aarzū diid kī 'arse se dobāra hai mujhe

ek hī baar meñ jal jaa.e ye vo tuur nahīñ

aap kā jaur-o-sitam aur ziyāda ho sadā

ho ifāqa ye 'vafā' ko merī manzūr nahīñ

zaKHm-e-dil ka ho mudawa mujhe manzur nahin

zist ka meri sahaara hai ye nasur nahin

mangta hun main tujhe tujh se naya hai ye sawal

baat rad karna gada ki tera dastur nahin

aap aa jaen dam-e-naza mujhe lene ko

aap ki shan-e-karam se to ye kuchh dur nahin

aish ke sab hi hain saman mayassar lekin

mera saqi nahin wo baada-e-maKHmur nahin

aarzu did ki 'arse se dobara hai mujhe

ek hi bar mein jal jae ye wo tur nahin

aap ka jaur-o-sitam aur ziyaada ho sada

ho ifaqa ye 'wafa' ko meri manzur nahin