zaKHm-e-hijran ki mudawat se pahle pahle

zaḳhm-e-hijrāñ kī mudāvāt se pahle pahle

dard raqsāñ hai mulāqāt se pahle pahle

qaid-e-zindāñ ho yā ho faisla sarkūbī kā

lāzima sochiye haq baat se pahle pahle

kaash vo aaj palaT aa.e kisī bhī sūrat

chāñdnī raat kī barsāt se pahle pahle

raah se bhaTkī na.ī nasl bachānī hai hameñ

mumkina āmad-e-āfāt se pahle pahle

kaise mahfūz rakhā jā.egā tūfāñ meñ shajar

koī tadbīr ho samrāt se pahle pahle

sochiye qaum ko bharpā.ī na karnī paḌ jaa.e

vaqt be-vaqt ke jazbāt se pahle pahle

dar nahīñ lāzmī buniyād kī mazbūtī hai

aane vaale bure hālāt se pahle pahle

log ḳhush hoñ ki na hoñ rab to ho raazī 'as.ad'

ziist ke āḳhrī lamhāt se pahle pahle

zaKHm-e-hijran ki mudawat se pahle pahle

dard raqsan hai mulaqat se pahle pahle

qaid-e-zindan ho ya ho faisla sarkubi ka

lazima sochiye haq baat se pahle pahle

kash wo aaj palaT aae kisi bhi surat

chandni raat ki barsat se pahle pahle

rah se bhaTki nai nasl bachani hai hamein

mumkina aamad-e-afat se pahle pahle

kaise mahfuz rakha jaega tufan mein shajar

koi tadbir ho samraat se pahle pahle

sochiye qaum ko bharpai na karni paD jae

waqt be-waqt ke jazbaat se pahle pahle

dar nahin lazmi buniyaad ki mazbuti hai

aane wale bure haalat se pahle pahle

log KHush hon ki na hon rab to ho raazi 'asad'

zist ke aaKHri lamhat se pahle pahle