zaKHm-e-ulfat ayan nahin hota

zaḳhm-e-ulfat ayaañ nahīñ hotā

aañkh se ḳhuuñ ravāñ nahīñ hotā

husn ko sirf vahm hai varna

ishq to bad-gumāñ nahīñ hotā

koī manzil bhalā qadam chūme

azm jab tak javāñ nahīñ hotā

dekhiye to naqāb ulaT ke zarā

chāñd kab tak ayaañ nahīñ hotā

dekh kar ġham-zada se kuchh chehre

dard-e-dil kyuuñ ayaañ nahīñ hotā

koh-o-sahrā ho dasht-e-aiman ho

guzar apnā kahāñ nahīñ hotā

phuul kaise vahāñ na ḳhaar lageñ

zikr terā jahāñ nahīñ hotā

maiñ to kyā dil bhī merā us kā hai

jo kabhī mehrbāñ nahīñ hotā

zor-e-tūfāñ hai duur sāhil hai

nāḳhudā mehrbāñ nahīñ hotā

rāz-dāñ kis ko kis tarah samjhūñ

rāz-e-dil to bayāñ nahīñ hotā

sheriyat sher meñ ho kaise 'nazīr'

zehn jab tak ravāñ nahīñ hotā

zaKHm-e-ulfat ayan nahin hota

aankh se KHun rawan nahin hota

husn ko sirf wahm hai warna

ishq to bad-guman nahin hota

koi manzil bhala qadam chume

azm jab tak jawan nahin hota

dekhiye to naqab ulaT ke zara

chand kab tak ayan nahin hota

dekh kar gham-zada se kuchh chehre

dard-e-dil kyun ayan nahin hota

koh-o-sahra ho dasht-e-aiman ho

guzar apna kahan nahin hota

phul kaise wahan na KHar lagen

zikr tera jahan nahin hota

main to kya dil bhi mera us ka hai

jo kabhi mehrban nahin hota

zor-e-tufan hai dur sahil hai

naKHuda mehrban nahin hota

raaz-dan kis ko kis tarah samjhun

raaz-e-dil to bayan nahin hota

sheriyat sher mein ho kaise 'nazir'

zehn jab tak rawan nahin hota