zaKHm-ha-e-dil ko unki KHak-e-pa yaad aa gai

zaḳhm-hā-e-dil ko un kī ḳhāk-e-pā yaad aa ga.ī

ishq ke āzār kī āḳhir davā yaad aa ga.ī

vaqt-e-ruḳhsat kyā batā.eñ jaan par kyūñkar banī

us ne muñh moḌā hī thā ham ko qazā yaad aa ga.ī

aaj jab barham huā mujh se zamāne kā mizāj

barhamī-e-husn kī dilkash adā yaad aa ga.ī

un kā kyā shikva taġhayyur hai yahāñ har chiiz ko

naaz thā jin par kabhī un kī vafā yaad aa ga.ī

dil hī dil meñ rah gayā merā duā kā ishtiyāq

be-asar niklī thī pahle vo duā yaad aa ga.ī

maiñ bhulānā chāhtā thā zehn se majbūr thā

hijr meñ ik ek kar ke har balā yaad aa ga.ī

sote sote hañs rahe the ḳhvāb meñ aaya thā kaun

baiThe baiThe ro diye kis kī 'shifā' yaad aa ga.ī

zaKHm-ha-e-dil ko un ki KHak-e-pa yaad aa gai

ishq ke aazar ki aaKHir dawa yaad aa gai

waqt-e-ruKHsat kya bataen jaan par kyunkar bani

us ne munh moDa hi tha hum ko qaza yaad aa gai

aaj jab barham hua mujh se zamane ka mizaj

barhami-e-husn ki dilkash ada yaad aa gai

un ka kya shikwa taghayyur hai yahan har chiz ko

naz tha jin par kabhi un ki wafa yaad aa gai

dil hi dil mein rah gaya mera dua ka ishtiyaq

be-asar nikli thi pahle wo dua yaad aa gai

main bhulana chahta tha zehn se majbur tha

hijr mein ek ek kar ke har bala yaad aa gai

sote sote hans rahe the KHwab mein aaya tha kaun

baiThe baiThe ro diye kis ki 'shifa' yaad aa gai