zaKHm hi zaKHm hain dil par kabhi aisa to na tha

zaḳhm hī zaḳhm haiñ dil par kabhī aisā to na thā

karam-e-yār kā nashtar kabhī aisā to na thā

phuul jo mujh ko diye ban ga.e vo añgāre

vaqt ayyār-o-sitamgar kabhī aisā to na thā

bastiyāñ raaz kī ashkoñ meñ bahī jaatī haiñ

maujzan ġham kā samundar kabhī aisā to na thā

aaj dast-e-talab uTThe to qalam ho jaa.e

daur-e-mahrūmī-e-sāġhar kabhī aisā to na thā

aane vaale nahīñ jab vo to ye raunaq kaisī

aaj jaisā hai mirā ghar kabhī aisā to na thā

chhin ga.ī ho na tajallī kahīñ dīvāroñ se

shor maiḳhāne ke bāhar kabhī aisā to na thā

paañv rakkhā thā jahāñ sarv meñ ḳham hai ab tak

jāda-e-ishq meñ patthar kabhī aisā to na thā

zaKHm hi zaKHm hain dil par kabhi aisa to na tha

karam-e-yar ka nashtar kabhi aisa to na tha

phul jo mujh ko diye ban gae wo angare

waqt ayyar-o-sitamgar kabhi aisa to na tha

bastiyan raaz ki ashkon mein bahi jati hain

maujzan gham ka samundar kabhi aisa to na tha

aaj dast-e-talab uTThe to qalam ho jae

daur-e-mahrumi-e-saghar kabhi aisa to na tha

aane wale nahin jab wo to ye raunaq kaisi

aaj jaisa hai mera ghar kabhi aisa to na tha

chhin gai ho na tajalli kahin diwaron se

shor maiKHane ke bahar kabhi aisa to na tha

panw rakkha tha jahan sarw mein KHam hai ab tak

jada-e-ishq mein patthar kabhi aisa to na tha