zaKHm kab ka tha dard uTha hai ab

zaḳhm kab kā thā dard uThā hai ab

us ke jaane kā dukh huā hai ab

merī āñkhoñ meñ ḳhvāb haiñ jis ke

us kī āñkhoñ meñ rat-jagā hai ab

sunte aate haiñ qāfila dil kā

rahguzar meñ kahīñ rukā hai ab

vo jo patthar kā thā musāfir vo

shahr-e-afsūñ se aa gayā hai ab

jo mirī ḳhvāhishoñ kī manzil thī

us ke aane kā rāsta hai ab

jis ko DhūñDā thā maiñ ne har jānib

mere dil meñ kahīñ chhupā hai ab

kitne ḳhvāboñ meñ rañg us ke haiñ

kitnī āñkhoñ se dekhtā hai ab

kitne mausam haiñ sirf us ke liye

kitne chehroñ pe vo sajā hai ab

kitnī bātoñ meñ us kī bāteñ haiñ

kitne lahjoñ meñ boltā hai ab

jo tire shahr le ke aatā thā

ruḳh vo dariyā badal rahā hai ab

aao dastak hī de ke dekheñ to

vahī darvāza phir khulā hai ab

is havāle se zindagī merī

ghane jañgal kā silsila hai ab

ek dīvāna apnī vahshat meñ

baat kahne kī kah gayā hai ab

zaKHm kab ka tha dard uTha hai ab

us ke jaane ka dukh hua hai ab

meri aankhon mein KHwab hain jis ke

us ki aankhon mein rat-jaga hai ab

sunte aate hain qafila dil ka

rahguzar mein kahin ruka hai ab

wo jo patthar ka tha musafir wo

shahr-e-afsun se aa gaya hai ab

jo meri KHwahishon ki manzil thi

us ke aane ka rasta hai ab

jis ko DhunDa tha main ne har jaanib

mere dil mein kahin chhupa hai ab

kitne KHwabon mein rang us ke hain

kitni aankhon se dekhta hai ab

kitne mausam hain sirf us ke liye

kitne chehron pe wo saja hai ab

kitni baaton mein us ki baaten hain

kitne lahjon mein bolta hai ab

jo tere shahr le ke aata tha

ruKH wo dariya badal raha hai ab

aao dastak hi de ke dekhen to

wahi darwaza phir khula hai ab

is hawale se zindagi meri

ghane jangal ka silsila hai ab

ek diwana apni wahshat mein

baat kahne ki kah gaya hai ab