zaKHm khate hue girne ki adakari ki

zaḳhm khāte hue girne kī adākārī kī

us ne ik vaar kiyā maiñ ne samajhdārī kī

aap milte the to phir jaan fidā karte the

intihā thī hī nahīñ aap kī 'ayyārī kī

tū 'ilāj-e-dil-e-betāb kā beḌā na uThā

tujh se tashḳhīs na hogī mirī bīmārī kī

dekhte dekhte hote the alaao raushan

log sunte the kahānī mirī chingārī kī

'ain mumkin hai ki maiñ ḳhud bhī yahīñ rah jā.ūñ

itnī 'ujlat meñ agar kuuch kī tayyārī kī

log to ḳhū-e-baġhāvat ko burā jānte the

ham ne is shahr meñ ik rasm na.ī jaarī kī

is meñ merā koī e'jāz nahīñ hai 'maz.har'

is qabīle meñ rivāyat hai vafādārī kī

zaKHm khate hue girne ki adakari ki

us ne ek war kiya main ne samajhdari ki

aap milte the to phir jaan fida karte the

intiha thi hi nahin aap ki 'ayyari ki

tu 'ilaj-e-dil-e-betab ka beDa na uTha

tujh se tashKHis na hogi meri bimari ki

dekhte dekhte hote the alao raushan

log sunte the kahani meri chingari ki

'ain mumkin hai ki main KHud bhi yahin rah jaun

itni 'ujlat mein agar kuch ki tayyari ki

log to KHu-e-baghawat ko bura jaante the

hum ne is shahr mein ek rasm nai jari ki

is mein mera koi e'jaz nahin hai 'mazhar'

is qabile mein riwayat hai wafadari ki