zaKHm ko marham karenge aap rahne dijiye

zaḳhm ko marham kareñge aap rahne dījiye

kaam ye bhī ham kareñge aap rahne dījiye

ḳhairiyat ko aap aa.e to baḌī hairat huī

dukh hamārā kam kareñge aap rahne dījiye

aap ne aañsū diye haiñ aur ab mere liye

aap āñkheñ nam kareñge aap rahne dījiye

'ishq kā mujh ko maraz hai kyā davā aur kyā du'ā

paḌh ke kyā kyā dam kareñge aap rahne dījiye

aap kī fitrat meñ hai vā'da-ḳhilāfī is liye

'ahd-o-paimāñ ham kareñge aap rahne dījiye

aap kī āñkhoñ ke aañsū ab hamāre naam haiñ

ham inheñ shabnam kareñge aap rahne dījiye

kāmyābī ke liye 'fārūq' lāzim hai yahī

'azm ko mohkam kareñge aap rahne dījiye

zaKHm ko marham karenge aap rahne dijiye

kaam ye bhi hum karenge aap rahne dijiye

KHairiyat ko aap aae to baDi hairat hui

dukh hamara kam karenge aap rahne dijiye

aap ne aansu diye hain aur ab mere liye

aap aankhen nam karenge aap rahne dijiye

'ishq ka mujh ko maraz hai kya dawa aur kya du'a

paDh ke kya kya dam karenge aap rahne dijiye

aap ki fitrat mein hai wa'da-KHilafi is liye

'ahd-o-paiman hum karenge aap rahne dijiye

aap ki aankhon ke aansu ab hamare nam hain

hum inhen shabnam karenge aap rahne dijiye

kaamyabi ke liye 'faruq' lazim hai yahi

'azm ko mohkam karenge aap rahne dijiye