zaKHm ko phul lahu ko jo hina kahte hain

zaḳhm ko phuul lahū ko jo hinā kahte haiñ

un ko shā.ir nahīñ shā.ir kā chachā kahte haiñ

ham to patlī sī chhaḌī bhī nahīñ kahte us ko

log aulād ko piirī kā asā kahte haiñ

sirf afsar use kahnā to koī baat nahīñ

ham to sāhab ko clerkoñ kā ḳhudā kahte haiñ

shādiyāñ apnī kiyā karte haiñ jo le ke talāq

un ko sab log gadā ibn-e-gadā kahte haiñ

us ko piite hī kiyā kartā huuñ meñ sair-e-falak

āsmānī use sab log bajā kahte haiñ

āḳhirash ho hī gayā shaiḳh se aur ham se milāp

vo bhatījā hameñ ham un ko chachā kahte haiñ

sun ke āvāz-e-azāñ mis ne ye pūchhā 'hāshim'

is qadar chīḳh ke masjid meñ ye kyā kahte haiñ

zaKHm ko phul lahu ko jo hina kahte hain

un ko shair nahin shair ka chacha kahte hain

hum to patli si chhaDi bhi nahin kahte us ko

log aulad ko piri ka asa kahte hain

sirf afsar use kahna to koi baat nahin

hum to sahab ko clerkon ka KHuda kahte hain

shadiyan apni kiya karte hain jo le ke talaq

un ko sab log gada ibn-e-gada kahte hain

us ko pite hi kiya karta hun mein sair-e-falak

aasmani use sab log baja kahte hain

aaKHirash ho hi gaya shaiKH se aur hum se milap

wo bhatija hamein hum un ko chacha kahte hain

sun ke aawaz-e-azan mis ne ye puchha 'hashim'

is qadar chiKH ke masjid mein ye kya kahte hain