زخم کو زخم نہیں جسم کی زینت سمجھو

زخم کو زخم نہیں جسم کی زینت سمجھو

زندہ دل ہو تو ہر اک رنج کو راحت سمجھو

سادگی اتنی بھی اچھی نہیں ناداں نہ بنو

پیار کو پیار عداوت کو عداوت سمجھو

شاخ گل سے مجھے تشبیہ نہ دو ضد نہ کرو

آگ میں جلتی ہوئی کوئی عمارت سمجھو

جلد بازی میں کوئی رائے نہ قائم کر لو

غور سے خط کو پڑھو خط کی عبارت سمجھو

ایک بیدار نفس شہر میں زندہ ہے ابھی

قدر داران جنوں یہ بھی غنیمت سمجھو

خود نمائی کا ذریعہ ہوں مری قدر کرو

آئنہ ہوں مجھے چہروں کی امانت سمجھو

تلخ گو ہو کے بھی ہر حال میں مخلص ہوں عزیزؔ

میری عادت کو نہ دیکھو مری فطرت سمجھو