zaKHm nasur koi hone se

zaḳhm nāsūr koī hone se

dard ugtā hai dard bone se

vo thā markūz mere markaz par

aur udhaḌtā rahā maiñ kone se

chalo ab hañs ke dekh lete haiñ

dil pighalte nahīñ haiñ rone se

ise ham suud ab kaheñ yā ziyāñ

mil gayā ḳhvāb niiñd khone se

vo añdheroñ meñ hī rahe āḳhir

bujh ga.e jo charāġh Dhone se

din meñ bhī raat kā samāñ hogā

jāgte meñ yuuñ sab ke sone se

merī miTTī hai ab talak kachchī

ghul na jā.ūñ kahīñ bhigone se

ab samundar nipaT akelā hai

kyā milā kashtiyāñ Dubone se

mere saa.e se ye bhī zāhir hai

nuur haa.il hai mere hone se

zaKHm nasur koi hone se

dard ugta hai dard bone se

wo tha markuz mere markaz par

aur udhaDta raha main kone se

chalo ab hans ke dekh lete hain

dil pighalte nahin hain rone se

ise hum sud ab kahen ya ziyan

mil gaya KHwab nind khone se

wo andheron mein hi rahe aaKHir

bujh gae jo charagh Dhone se

din mein bhi raat ka saman hoga

jagte mein yun sab ke sone se

meri miTTi hai ab talak kachchi

ghul na jaun kahin bhigone se

ab samundar nipaT akela hai

kya mila kashtiyan Dubone se

mere sae se ye bhi zahir hai

nur hail hai mere hone se