زخم سے خوف ہمیں مثل گہر کچھ بھی نہیں

زخم سے خوف ہمیں مثل گہر کچھ بھی نہیں

خواہش چارۂ ناسور جگر کچھ بھی نہیں

اتنی مدت سے نکالا ہے کہ مانند عدم

کوئی پوچھے تو مجھے یاد وہ گھر کچھ بھی نہیں

دئے اس ہستئ موہوم نے کیا کیا دھوکے

گو کہ ظاہر میں یہ سب کچھ ہے مگر کچھ بھی نہیں

صرف کی عمر عبث شغل دعا میں ہم نے

کہ سمجھتے تھے کوئی شے ہے اثر کچھ بھی نہیں

کیجے کشتہ مجھے کام آؤں گا مثل سیماب

آپ کا فائدہ ہے اس میں ضرر کچھ بھی نہیں

صبح پیری ہوئی اور کوچ کا وقت آ پہنچا

حیف ہے پاس مرے زاد سفر کچھ بھی نہیں

بحر رحمت پہ خدا کے نہیں زاہد کو نظر

سامنے اس کے مرا دامن تر کچھ بھی نہیں

کیوں مری قتل پہ باندھا اسے کھولو صاحب

میں گنہ گار ہوں اور جرم کمر کچھ بھی نہیں

بد گمانی نے یہاں وہم لگائے کیا کیا

واں ستانے کے سوا مد نظر کچھ بھی نہیں

ہے شب وصل مئے وصل پیو تم بے خوف

آنکھ کیوں آپ کی ہے جانب در کچھ بھی نہیں

درہم داغ بھی گردوں نے دئے پر صابرؔ

اس میں ہوتی مری اوقات بسر کچھ بھی نہیں