hota hai miTne hi ke liye har laga hua

hotā hai miTne hī ke liye har lagā huā

lekin vo ek daaġh na lag kar lagā huā

dil baiTh baiTh jaatā hai ā.īna dekh kar

jaane ye kaisā rog hai bhītar lagā huā

aise hī baat baat pe rotā nahīñ huuñ maiñ

ik zaḳhm hai kahīñ mire andar lagā huā

andar bichhā huā hai koī jaal aur hī

daam aur hai dukān ke bāhar lagā huā

Dartā bhī huuñ ki ho hī na jaa.e kahīñ vo kaam

ik 'umr se huuñ jis meñ barābar lagā huā

hotā nahīñ javān laḌakpan ke baa'd bhī

lagtā nahīñ ġharīb kā number lagā huā

vo ittifāq se mirā mahbūb hai to kyā

jachtā hai ek shaḳhs hī afsar lagā huā

'javvād' zindagī kī tarah thī koī saḌak

donoñ taraf qatār meñ kīkar lagā huā

hota hai miTne hi ke liye har laga hua

lekin wo ek dagh na lag kar laga hua

dil baiTh baiTh jata hai aaina dekh kar

jaane ye kaisa rog hai bhitar laga hua

aise hi baat baat pe rota nahin hun main

ek zaKHm hai kahin mere andar laga hua

andar bichha hua hai koi jal aur hi

dam aur hai dukan ke bahar laga hua

Darta bhi hun ki ho hi na jae kahin wo kaam

ek 'umr se hun jis mein barabar laga hua

hota nahin jawan laDakpan ke ba'd bhi

lagta nahin gharib ka number laga hua

wo ittifaq se mera mahbub hai to kya

jachta hai ek shaKHs hi afsar laga hua

'jawwad' zindagi ki tarah thi koi saDak

donon taraf qatar mein kikar laga hua