zaKHm tere atwar ke aksar ek hi jaise hote hain

zaḳhm tire atvār ke aksar ek hī jaise hote haiñ

tiir zabāñ talvār ke nashtar ek hī jaise hote haiñ

chehre badle aadat badlī ruuh ne phūñkī jaan na.ī

varna sab miTTī ke paikar ek hī jaise hote haiñ

kaun paḌā hogā rastoñ par kis ko puujā jā.egā

yuuñ dekho to saare patthar ek hī jaise hote haiñ

nafrat ne hai ḳhuun bichhāyā duniyā kī jin galiyoñ meñ

un saarī galiyoñ ke manzar ek hī jaise hote haiñ

kāñToñ ke hoñ maḳhmal ke yā fōTpāthoñ kī god meñ hoñ

niiñd agar ho saare bistar ek hī jaise hote haiñ

ā.īne jab DhūñD rahe hoñ jhuuT nagar meñ sachchā.ī

saare chehre sab chehroñ par ek hī jaise hote haiñ

daulat ġhurbat shaah gadāgar sab duniyā ke mele haiñ

turbat meñ fuqarā-o-sikandar ek hī jaise hote haiñ

ghar ho yā sahrā kā dāman mujh ko hai sab ek 'nasīm'

vīrāne to andar bāhar ek hī jaise hote haiñ

zaKHm tere atwar ke aksar ek hi jaise hote hain

tir zaban talwar ke nashtar ek hi jaise hote hain

chehre badle aadat badli ruh ne phunki jaan nai

warna sab miTTi ke paikar ek hi jaise hote hain

kaun paDa hoga raston par kis ko puja jaega

yun dekho to sare patthar ek hi jaise hote hain

nafrat ne hai KHun bichhaya duniya ki jin galiyon mein

un sari galiyon ke manzar ek hi jaise hote hain

kanTon ke hon maKHmal ke ya fooTpathon ki god mein hon

nind agar ho sare bistar ek hi jaise hote hain

aaine jab DhunD rahe hon jhuT nagar mein sachchai

sare chehre sab chehron par ek hi jaise hote hain

daulat ghurbat shah gadagar sab duniya ke mele hain

turbat mein fuqara-o-sikandar ek hi jaise hote hain

ghar ho ya sahra ka daman mujh ko hai sab ek 'nasim'

virane to andar bahar ek hi jaise hote hain