zaKHm to bahut aae phir bhi hausla rakkha

zaḳhm to bahut aa.e phir bhī hausla rakkhā

umr-bhar mohabbat meñ ham ne dil baḌā rakkhā

jis ne ek lamha bhī tujh se vāsta rakkhā

apne-āp ko ḳhud se umr-bhar judā rakkhā

barg-e-ḳhushk kī sūrat log ho ke āvāra

sochte haiñ sarsar kā naam kyuuñ sabā rakkhā

jab use na aanā thā phir ye kis tavaqqo.a par

ham ne ghar kā darvāza rāt-bhar khulā rakkhā

dil ġham-e-zamāna kī dastaras meñ kyā aatā

pattharoñ kī zad par ḳhud ham ne aa.ina rakkhā

ishq ko salīqe se kuchh hamīñ ne bartā hai

varna qurbatoñ meñ yuuñ kis ne fāsla rakkhā

yaad kar ke ro.egā tū sulūk ġhairoñ kā

tū ne 'ḳhāvar' apnoñ se kuchh jo vāsta rakkhā

zaKHm to bahut aae phir bhi hausla rakkha

umr-bhar mohabbat mein hum ne dil baDa rakkha

jis ne ek lamha bhi tujh se wasta rakkha

apne-ap ko KHud se umr-bhar juda rakkha

barg-e-KHushk ki surat log ho ke aawara

sochte hain sarsar ka nam kyun saba rakkha

jab use na aana tha phir ye kis tawaqqoa par

hum ne ghar ka darwaza raat-bhar khula rakkha

dil gham-e-zamana ki dastaras mein kya aata

pattharon ki zad par KHud hum ne aaina rakkha

ishq ko saliqe se kuchh hamin ne barta hai

warna qurbaton mein yun kis ne fasla rakkha

yaad kar ke roega tu suluk ghairon ka

tu ne 'KHawar' apnon se kuchh jo wasta rakkha