zaKHm to zaKHm hai kuchh der mein bhar jaega

zaḳhm to zaḳhm hai kuchh der meñ bhar jā.egā

lafz nashtar hai rag-e-jāñ meñ utar jā.egā

terī rahmat kā ye dariyā vo musāfir hai ki jo

merī bastī se dabe paañv guzar jā.egā

rañg kachchā hai tire shahr-e-vafā kā jānāñ

ġham kī ik lahr chalegī to utar jā.egā

aa terī maañg meñ is shaam kī surḳhī bhar duuñ

us kī taz.īn se ye husn nikhar jā.egā

is qadar maut ke sāmāñ kā hai ambār lagā

kal kā insān jo dekhegā to Dar jā.egā

zulm kī dhuup meñ nafrat to panap saktī hai

pyaar to phuul hai is dhuup meñ mar jā.egā

pahle barbād to kar le ye zamīñ kā chehra

phir ye insān kisī aur nagar jā.egā

zaKHm to zaKHm hai kuchh der mein bhar jaega

lafz nashtar hai rag-e-jaan mein utar jaega

teri rahmat ka ye dariya wo musafir hai ki jo

meri basti se dabe panw guzar jaega

rang kachcha hai tere shahr-e-wafa ka jaanan

gham ki ek lahr chalegi to utar jaega

aa teri mang mein is sham ki surKHi bhar dun

us ki tazin se ye husn nikhar jaega

is qadar maut ke saman ka hai ambar laga

kal ka insan jo dekhega to Dar jaega

zulm ki dhup mein nafrat to panap sakti hai

pyar to phul hai is dhup mein mar jaega

pahle barbaad to kar le ye zamin ka chehra

phir ye insan kisi aur nagar jaega