زخم تمہارے بھر جائیں گے تھوڑی دیر لگے گی

زخم تمہارے بھر جائیں گے تھوڑی دیر لگے گی

بے صبری سے کام لیا تو اور بھی دیر لگے گی

صاحب آج تو اپنا کام کرا کے جائیں گے ہم

ساری شرطیں پوری ہیں پھر کیسی دیر لگے گی

یوں بے حال نہ ہو اے دل بس آتے ہی ہوں گے وہ

کل بھی دیر لگی تھی ان کو آج بھی دیر لگے گی

سیکھ لیا ہے میں نے اپنے آپ سے باتیں کرنا

فکر نہیں ان کو آنے میں کتنی دیر لگے گی

کون رکے اب اس کے در پر شام ہوئی گھر جائیں

اتنا ضروری کام نہیں ہے جتنی دیر لگے گی

اتنی دیر میں کچھ کے کچھ ہو جائیں گے حالات

خط لکھنے سے خط ملنے تک جتنی دیر لگے گی

مار گزیدہ کون بچا ہے باصرؔ شکر کرو تم

ٹھیک بھی ہو جاؤ گے لیکن خاصی دیر لگے گی