zaKHmi na bhul jaen maze dil ki Tis ke

zaḳhmī na bhuul jaa.eñ maze dil kī Tiis ke

lillāh chhiḌke jaao namak piis piis ke

ġhussa hai zahr haq meñ dil-e-be-anīs ke

almās pīste ho abas daañt piis ke

mailī nigāh hotī hai ā.īna dekh kar

nazzāre muddatoñ se haiñ rū-e-nafīs ke

ḳhalvat meñ hī tasavvur-e-jānāñ nadīm hai

tālib jalīs ke haiñ na ḳhvāhāñ aniis ke

ma.anī na paa.e jauhar-e-shamshīr-e-yār ke

TukḌe jigar ke ho ga.e TukḌe kasīs ke

phīkā hī zā.iqa dahan-e-zaḳhm kā rahā

kyā bad-maza huā maiñ namak piis piis ke

pīr-e-falak kisī ko na degā zar-e-nujūm

ya.anī diram haiñ ye kaf-e-dast-e-ḳhasīs ke

kaT kaT gayā maiñ dekh ke mazmūn-e-qatl ko

ai but qalam hoñ haath tire ḳhush-naves ke

das biis har mahīne meñ abrū nazar paḌe

is saal saare chāñd hue tiis tiis ke

harf aa gayā shikastagī-e-dil ke likhne meñ

TuuTe qalam hazāroñ shikasta-naves ke

likhte haiñ chhup ke kātib-e-āmāl sab kā haal

a.amāl-nāma parcha haiñ ḳhufya-naves ke

maktūb meñ ibārat-e-rañgīñ likho 'munīr'

fiqre nahīñ pasand daqīq-o-salīs ke

zaKHmi na bhul jaen maze dil ki Tis ke

lillah chhiDke jao namak pis pis ke

ghussa hai zahr haq mein dil-e-be-anis ke

almas piste ho abas dant pis ke

maili nigah hoti hai aaina dekh kar

nazzare muddaton se hain ru-e-nafis ke

KHalwat mein hi tasawwur-e-jaanan nadim hai

talib jalis ke hain na KHwahan anis ke

mani na pae jauhar-e-shamshir-e-yar ke

TukDe jigar ke ho gae TukDe kasis ke

phika hi zaiqa dahan-e-zaKHm ka raha

kya bad-maza hua main namak pis pis ke

pir-e-falak kisi ko na dega zar-e-nujum

yani diram hain ye kaf-e-dast-e-KHasis ke

kaT kaT gaya main dekh ke mazmun-e-qatl ko

ai but qalam hon hath tere KHush-nawes ke

das bis har mahine mein abru nazar paDe

is sal sare chand hue tis tis ke

harf aa gaya shikastagi-e-dil ke likhne mein

TuTe qalam hazaron shikasta-nawes ke

likhte hain chhup ke katib-e-amal sab ka haal

aamal-nama parcha hain KHufya-nawes ke

maktub mein ibarat-e-rangin likho 'munir'

fiqre nahin pasand daqiq-o-salis ke