zaKHmon ne mujh mein darwaze khole hain

zaḳhmoñ ne mujh meñ darvāze khole haiñ

maiñ ne vaqt se pahle Tāñke khole haiñ

bāhar aane kī bhī sakat nahīñ ham meñ

tū ne kis mausam meñ pinjre khole haiñ

barsoñ se āvāzeñ jamtī jaatī thiiñ

ḳhāmoshī ne kaan ke parde khole haiñ

kaun hamārī pyaas pe Daakā Daal gayā

kis ne mashkīzoñ ke tasme khole haiñ

varna dhuup kā parbat kis se kaTtā thā

us ne chhatrī khol ke raste khole haiñ

ye merā pahlā ramzān thā us ke baġhair

mat pūchho kis muñh se roze khole haiñ

yuuñ to mujh ko kitne ḳhat mausūl hue

ik do aise the jo dil se khole haiñ

mannat mānñe vāloñ ko mālūm nahīñ

kis ne aa kar peḌ se dhāge khole haiñ

dariyā band kiyā hai kuuze meñ 'tahzīb'

ik chābī se saare taale khole haiñ

zaKHmon ne mujh mein darwaze khole hain

main ne waqt se pahle Tanke khole hain

bahar aane ki bhi sakat nahin hum mein

tu ne kis mausam mein pinjre khole hain

barson se aawazen jamti jati thin

KHamoshi ne kan ke parde khole hain

kaun hamari pyas pe Daka Dal gaya

kis ne mashkizon ke tasme khole hain

warna dhup ka parbat kis se kaTta tha

us ne chhatri khol ke raste khole hain

ye mera pahla ramzan tha us ke baghair

mat puchho kis munh se roze khole hain

yun to mujh ko kitne KHat mausul hue

ek do aise the jo dil se khole hain

mannat manne walon ko malum nahin

kis ne aa kar peD se dhage khole hain

dariya band kiya hai kuze mein 'tahzib'

ek chabi se sare tale khole hain