zalzala aaya wo dil mein waqt ki raftar se

zalzala aayā vo dil meñ vaqt kī raftār se

ḳhud-baḳhud tasvīr terī gir paḌī dīvār se

chupke chupke khīñchtā jaatā huuñ kāñToñ kā hisār

maiñ ki ab Darne lagā huuñ phuul kī mahkār se

ham balā-noshoñ ne zahr-e-āgahī bhī pī liyā

chalte chalte ham bhī Thokar khā ga.e kohsār se

jin ko āñkhoñ se lagāyā jin ko ro ro kar paḌhā

haa.e vo ḳhat bhī nazar aane lage bekār se

dīda-e-yāqūb har chehre meñ hai girya-kunāñ

ham bahut uktā ga.e haiñ misr ke bāzār se

ham se shikva kar rahā thā aaj dāmān-e-tahī

toḌ laa.e māh-o-anjum fikr ke gulzār se

'nūr' sāhab khul na jaa.e tark-e-ulfat kā bharam

aap kī ḳhāmoshiyoñ se aap ke ash.ār se

zalzala aaya wo dil mein waqt ki raftar se

KHud-baKHud taswir teri gir paDi diwar se

chupke chupke khinchta jata hun kanTon ka hisar

main ki ab Darne laga hun phul ki mahkar se

hum bala-noshon ne zahr-e-agahi bhi pi liya

chalte chalte hum bhi Thokar kha gae kohsar se

jin ko aankhon se lagaya jin ko ro ro kar paDha

hae wo KHat bhi nazar aane lage bekar se

dida-e-yaqub har chehre mein hai girya-kunan

hum bahut ukta gae hain misr ke bazar se

hum se shikwa kar raha tha aaj daman-e-tahi

toD lae mah-o-anjum fikr ke gulzar se

'nur' sahab khul na jae tark-e-ulfat ka bharam

aap ki KHamoshiyon se aap ke ashaar se