zalzale jab ana ke ghazab Dha gae

zalzale jab anā ke ġhazab Dhā ga.e

sang-reze pahāḌoñ se Takrā ga.e

ham haiñ parvarda-e-hādsāt-e-jahāñ

aap to ek sadme se ghabrā ga.e

phuul hī phuul the ḳhushbuoñ ke chaman

husn-e-kirdār ko mere mahkā ga.e

jis kī qismat meñ thiiñ tang-dāmāniyāñ

pair chādar se aage vo phailā ga.e

buuñd paanī na sūkhī zamīñ ko milā

dekhne meñ ka.ī abr mañDlā ga.e

uḌtī uḌtī chalī aa.ī yād-e-vatan

ajnabī shahr meñ ham jo tanhā ga.e

ujlā ujlā sahī dāman-e-ahd-e-nau

saare naqsh-e-kuhan ham ko yaad aa ga.e

zalzale jab ana ke ghazab Dha gae

sang-reze pahaDon se Takra gae

hum hain parwarda-e-hadsat-e-jahan

aap to ek sadme se ghabra gae

phul hi phul the KHushbuon ke chaman

husn-e-kirdar ko mere mahka gae

jis ki qismat mein thin tang-damaniyan

pair chadar se aage wo phaila gae

bund pani na sukhi zamin ko mila

dekhne mein kai abr manDla gae

uDti uDti chali aai yaad-e-watan

ajnabi shahr mein hum jo tanha gae

ujla ujla sahi daman-e-ahd-e-nau

sare naqsh-e-kuhan hum ko yaad aa gae