zamana be-karan tha be-karan humne nahin rakkha

zamāna be-karāñ thā be-karāñ ham ne nahīñ rakkhā

tire ġham se varā koī jahāñ ham ne nahīñ rakkhā

hamesha sāmne aa.e misāl-e-sub.h-e-raḳhshanda

kabhī maddham ujāloñ kā samāñ ham ne nahīñ rakkhā

atā kī is zau se bazm-e-har-imkāñ ko tābānī

kabhī dil ko charāġh-e-nīm-jāñ ham ne nahīñ rakkhā

rahe nashshe meñ lekin intihā-e-ḳhāksārī se

ki sar par be-ḳhudī kā āsmāñ ham ne nahīñ rakkhā

hamāre āsmāñ kā har sitāra sab pe raushan hai

kisī zaḳhm-e-mohabbat ko nihāñ ham ne nahīñ rakkhā

kiyā hai zabt bhī to dard ke tūfāñ uThā.e haiñ

ḳhamoshī ko sukūt-e-ḳhūñ-chakāñ ham ne nahīñ rakkhā

hamārā har suḳhan sīdhā utartā hai dil-o-jāñ meñ

koī bhī ḳhanjar-e-ġham nā-tavāñ ham ne nahīñ rakkhā

zamana be-karan tha be-karan hum ne nahin rakkha

tere gham se wara koi jahan hum ne nahin rakkha

hamesha samne aae misal-e-subh-e-raKHshanda

kabhi maddham ujalon ka saman hum ne nahin rakkha

ata ki is zau se bazm-e-har-imkan ko tabani

kabhi dil ko charagh-e-nim-jaan hum ne nahin rakkha

rahe nashshe mein lekin intiha-e-KHaksari se

ki sar par be-KHudi ka aasman hum ne nahin rakkha

hamare aasman ka har sitara sab pe raushan hai

kisi zaKHm-e-mohabbat ko nihan hum ne nahin rakkha

kiya hai zabt bhi to dard ke tufan uThae hain

KHamoshi ko sukut-e-KHun-chakan hum ne nahin rakkha

hamara har suKHan sidha utarta hai dil-o-jaan mein

koi bhi KHanjar-e-gham na-tawan hum ne nahin rakkha