zamana hai ki guzra ja raha hai

zamāna hai ki guzrā jā rahā hai

ye dariyā hai ki bahtā jā rahā hai

vo uTThe dard uTThā hashr uTThā

magar dil hai ki baiThā jā rahā hai

lagī thī un ke qadmoñ se qayāmat

maiñ samjhā saath saayā jā rahā hai

zamāne par hañse koī ki ro.e

jo honā hai vo hotā jā rahā hai

mire dāġh-e-jigar ko phuul kah kar

mujhe kāñToñ meñ khīñchā jā rahā hai

bahār aa.ī ki din holī ke aa.e

guloñ meñ rañg khelā jā rahā hai

ravāñ hai umr aur insān ġhāfil

musāfir hai ki sotā jā rahā hai

sar-e-mayyat hai ye ibrat kā nauha

mohabbat kā janāza jā rahā hai

'jalīl' ab dil ko apnā dil na samjho

koī kar ke ishārā jā rahā hai

zamana hai ki guzra ja raha hai

ye dariya hai ki bahta ja raha hai

wo uTThe dard uTTha hashr uTTha

magar dil hai ki baiTha ja raha hai

lagi thi un ke qadmon se qayamat

main samjha sath saya ja raha hai

zamane par hanse koi ki roe

jo hona hai wo hota ja raha hai

mere dagh-e-jigar ko phul kah kar

mujhe kanTon mein khincha ja raha hai

bahaar aai ki din holi ke aae

gulon mein rang khela ja raha hai

rawan hai umr aur insan ghafil

musafir hai ki sota ja raha hai

sar-e-mayyat hai ye ibrat ka nauha

mohabbat ka janaza ja raha hai

'jalil' ab dil ko apna dil na samjho

koi kar ke ishaara ja raha hai