zamane bhar se kya apne se begana banati hai

zamāne bhar se kyā apne se begāna banātī hai

mohabbat vo burī shai hai ki dīvāna banātī hai

haqīqat thī patange kī magar ik be-haqīqat thī

yahī lau hai jo parvāne ko parvāna banātī hai

ināyat ho jo saaqī kī to dil kuuza nahīñ rahtā

samā jaatā hai ḳhum jis meñ vo paimāna banātī hai

vo chhup ke rah nahīñ sakte kisī goshe meñ bhī dil ke

farāvānī-e-jalva ā.ina-ḳhāna banātī hai

maiñ ḳhum ke ḳhum bhī pī jā.ūñ to laġhzish ho nahīñ saktī

magar mastī tirī āñkhoñ kī mastāna banātī hai

nigāh-e-fitna-sāmāñ bhī nigāh-e-multafit niklī

basā kar dil kī bastī ḳhud hī vīrāna banātī hai

do harf-e-ġham ke qisse ko ik āh-e-nā-tavāñ khiñch kar

na puurā hashr tak ho aisā afsāna banātī hai

nikalnā paañv kā chādar se hai sāmān-e-rusvā.ī

havas baḌh jaatī hai had se to dīvāna banātī hai

asās-e-zindagī 'navvāb' hai ummīd fardā kī

yahī dil ke ḳharābe ko parī-ḳhāna banātī hai

zamane bhar se kya apne se begana banati hai

mohabbat wo buri shai hai ki diwana banati hai

haqiqat thi patange ki magar ek be-haqiqat thi

yahi lau hai jo parwane ko parwana banati hai

inayat ho jo saqi ki to dil kuza nahin rahta

sama jata hai KHum jis mein wo paimana banati hai

wo chhup ke rah nahin sakte kisi goshe mein bhi dil ke

farawani-e-jalwa aaina-KHana banati hai

main KHum ke KHum bhi pi jaun to laghzish ho nahin sakti

magar masti teri aankhon ki mastana banati hai

nigah-e-fitna-saman bhi nigah-e-multafit nikli

basa kar dil ki basti KHud hi virana banati hai

do harf-e-gham ke qisse ko ek aah-e-na-tawan khinch kar

na pura hashr tak ho aisa afsana banati hai

nikalna panw ka chadar se hai saman-e-ruswai

hawas baDh jati hai had se to diwana banati hai

asas-e-zindagi 'nawwab' hai ummid farda ki

yahi dil ke KHarabe ko pari-KHana banati hai