zamane mein fasana ban gai diwangi meri

zamāne meñ fasāna ban ga.ī dīvāngī merī

tire parda ne kī parda-nashīñ parda-darī merī

tū hī ai be-ḳhudī-e-shauq kar kuchh rahbarī merī

usī markaz pe lekin aaj tak hai be-ḳhudī merī

har ik parda uThā degī kisī din be-ḳhudī merī

ki jān-e-manzil-e-maqsūd hai gum-gashtagī merī

vahī be-tābiyāñ jin ko balā-e-jāñ samajhtā thā

vahī betābi-e-paiham banī hai zindagī merī

na sahrā hai na gulshan hai na rasta hai na manzil hai

ḳhudā jaane kahāñ le jā rahī hai be-ḳhudī merī

tire jalve har ik shai meñ nazar aane lage lekin

yahīñ mahdūd ho kar rah na jaa.e be-ḳhudī merī

hudūd-e-be-niyāzī tak to mujh ko khīñch laa.ī hai

na jaane ab kahāñ le jā.egī vāraftagī merī

tirī sūrat nigāhoñ se kabhī ojhal nahīñ hotī

karishme haiñ tire jalvoñ ke yā sūrat-garī merī

nigāheñ multafit lab par tabassum kaif āñkhoñ meñ

Thahar jaa.e isī markaz pe yārab zindagī merī

falak pā-bos hotā hai malā.ek sajda karte haiñ

kahāñ le aa.ī mujh ko aaj shān-e-bandagī merī

na.īm-e-ḳhuld to badla hai jaañ kā mil gayā lekin

bahā-e-dard-e-dil aur qīmat-e-dīvāngī merī

hijābāt-e-mohabbat ḳhud-baḳhud tai hote jaate haiñ

nigāh-e-kufr-sāmāñ kar rahī hai rahbarī merī

'munīr' ik din zamāne ko zamāna maiñ banā dūñgā

kahāñ tak rā.egāñ jā.egī āḳhir be-ḳhudī merī

zamane mein fasana ban gai diwangi meri

tere parda ne ki parda-nashin parda-dari meri

tu hi ai be-KHudi-e-shauq kar kuchh rahbari meri

usi markaz pe lekin aaj tak hai be-KHudi meri

har ek parda uTha degi kisi din be-KHudi meri

ki jaan-e-manzil-e-maqsud hai gum-gashtagi meri

wahi be-tabiyan jin ko bala-e-jaan samajhta tha

wahi betabi-e-paiham bani hai zindagi meri

na sahra hai na gulshan hai na rasta hai na manzil hai

KHuda jaane kahan le ja rahi hai be-KHudi meri

tere jalwe har ek shai mein nazar aane lage lekin

yahin mahdud ho kar rah na jae be-KHudi meri

hudud-e-be-niyazi tak to mujh ko khinch lai hai

na jaane ab kahan le jaegi waraftagi meri

teri surat nigahon se kabhi ojhal nahin hoti

karishme hain tere jalwon ke ya surat-gari meri

nigahen multafit lab par tabassum kaif aankhon mein

Thahar jae isi markaz pe yarab zindagi meri

falak pa-bos hota hai malaek sajda karte hain

kahan le aai mujh ko aaj shan-e-bandagi meri

naim-e-KHuld to badla hai jaan ka mil gaya lekin

baha-e-dard-e-dil aur qimat-e-diwangi meri

hijabaat-e-mohabbat KHud-baKHud tai hote jate hain

nigah-e-kufr-saman kar rahi hai rahbari meri

'munir' ek din zamane ko zamana main bana dunga

kahan tak raegan jaegi aaKHir be-KHudi meri