zamane mein kahin dil ko lagana bhi zaruri tha

zamāne meñ kahīñ dil ko lagānā bhī zarūrī thā

ġhalat kuchh bhī nahīñ lekin chhupānā bhī zarūrī thā

ġham-e-daurāñ meñ ham ko muskurānā bhī zarūrī thā

ki kāñToñ se hameñ dāman bachānā bhī zarūrī thā

zamāna kyā kahegā ye nahīñ sochā kabhī ham ne

jo thā dil meñ hamāre vo batānā bhī zarūrī thā

hameñ patthar bhī khāne the hameñ gaalī bhī khānī thī

magar duniyā ko ā.īna dikhānā bhī zarūrī thā

hameñ hañste hue bas dekhtā to ruuTh jaatā vo

hameñ hañste hue aañsū bahānā bhī zarūrī thā

na ham so.e na vo so.e na aa.ī niiñd donoñ ko

magar jalte charāġhoñ ko bujhānā bhī zarūrī thā

zamane mein kahin dil ko lagana bhi zaruri tha

ghalat kuchh bhi nahin lekin chhupana bhi zaruri tha

gham-e-dauran mein hum ko muskurana bhi zaruri tha

ki kanTon se hamein daman bachana bhi zaruri tha

zamana kya kahega ye nahin socha kabhi hum ne

jo tha dil mein hamare wo batana bhi zaruri tha

hamein patthar bhi khane the hamein gali bhi khani thi

magar duniya ko aaina dikhana bhi zaruri tha

hamein hanste hue bas dekhta to ruTh jata wo

hamein hanste hue aansu bahana bhi zaruri tha

na hum soe na wo soe na aai nind donon ko

magar jalte charaghon ko bujhana bhi zaruri tha