zamane se meri zinda-dili dekhi nahin jati

zamāne se mirī zinda-dilī dekhī nahīñ jaatī

ḳhushī ho dūsroñ kī to ḳhushī dekhī nahīñ jaatī

ilāhī nuur se raushan haiñ rāheñ us ke bandoñ kī

vo aisī raushnī hai jo kabhī dekhī nahīñ jaatī

mohabbat hī se is duniyā meñ saare kaam chalte haiñ

kisī se kyoñ kisī kī dostī dekhī nahīñ jaatī

gharoñ kī shān-o-shaukat to gharoñ kī raushnī se hai

magar jalte gharoñ kī raushnī dekhī nahīñ jaatī

agar izzat hī luT jaa.e to jiinā bojh lagtā hai

kisī ma.asūm kī be-hurmatī dekhī nahīñ jaatī

pilā dī mast āñkhoñ se bachī na mai jo miinā meñ

ki saaqī se mirī tishna-labī dekhī nahīñ jaatī

sambhālūñ hosh apne to sambhālūñ dil jigar kaise

tumhārī muskurātī be-ruḳhī dekhī nahīñ jaatī

tabī.at is qadar machlī ke tauba toḌ dī ham ne

kareñ kyā ham se sāvan kī jhaḌī dekhī nahīñ jaatī

ḳhushī ke jashn meñ sadme numāyāñ aise hote haiñ

kisī ġhamgīn chehre par hañsī dekhī nahīñ jaatī

zamane se meri zinda-dili dekhi nahin jati

KHushi ho dusron ki to KHushi dekhi nahin jati

ilahi nur se raushan hain rahen us ke bandon ki

wo aisi raushni hai jo kabhi dekhi nahin jati

mohabbat hi se is duniya mein sare kaam chalte hain

kisi se kyon kisi ki dosti dekhi nahin jati

gharon ki shan-o-shaukat to gharon ki raushni se hai

magar jalte gharon ki raushni dekhi nahin jati

agar izzat hi luT jae to jina bojh lagta hai

kisi masum ki be-hurmati dekhi nahin jati

pila di mast aankhon se bachi na mai jo mina mein

ki saqi se meri tishna-labi dekhi nahin jati

sambhaalun hosh apne to sambhaalun dil jigar kaise

tumhaari muskuraati be-ruKHi dekhi nahin jati

tabiat is qadar machli ke tauba toD di hum ne

karen kya hum se sawan ki jhaDi dekhi nahin jati

KHushi ke jashn mein sadme numayan aise hote hain

kisi ghamgin chehre par hansi dekhi nahin jati