zamane Thik hai in se bahut hue raushan

zamāne Thiik hai in se bahut hue raushan

magar charāġh kahāñ ḳhud ko kar sake raushan

sabhī ke zehn meñ us kā ḳhayāl rahtā hai

us ek nuur se hai kitne aa.ine raushan

abhī to ham ko ka.ī roz jagmagānā hai

hamīñ hai dasht meñ ik āḳhirī diye raushan

mahak usī kī mirī rahnumā.ī kartī hai

usī kī chaap se hote haiñ rāste raushan

ham ek umr se tārīkiyoñ meñ simTe the

jab us ne chhū liyā to ham bhī ho ga.e raushan

kisī kā aks mujhe ḳhvāb meñ dikhā thā kabhī

tamām umr rahe mere rat-jage raushan

ye aadhī raat ko dastak sī kis ne dī dil par

ye kis ne kar diye har samt qumqume raushan

ham ek ruḳh se añdhere meñ aa ga.e lekin

ka.ī ruḳhoñ se hamāre haiñ silsile raushan

chalo 'dinesh' ab is dil se un kā nuur gayā

talāshte haiñ ilāqe bache-khuche raushan

zamane Thik hai in se bahut hue raushan

magar charagh kahan KHud ko kar sake raushan

sabhi ke zehn mein us ka KHayal rahta hai

us ek nur se hai kitne aaine raushan

abhi to hum ko kai roz jagmagana hai

hamin hai dasht mein ek aaKHiri diye raushan

mahak usi ki meri rahnumai karti hai

usi ki chap se hote hain raste raushan

hum ek umr se tarikiyon mein simTe the

jab us ne chhu liya to hum bhi ho gae raushan

kisi ka aks mujhe KHwab mein dikha tha kabhi

tamam umr rahe mere rat-jage raushan

ye aadhi raat ko dastak si kis ne di dil par

ye kis ne kar diye har samt qumqume raushan

hum ek ruKH se andhere mein aa gae lekin

kai ruKHon se hamare hain silsile raushan

chalo 'dinesh' ab is dil se un ka nur gaya

talashte hain ilaqe bache-khuche raushan