zamin aankhon ko mal rahi thi hawa ka koi nishan nahin tha

zamīn āñkhoñ ko mal rahī thī havā kā koī nishāñ nahīñ thā

tamām samteñ sulag rahī thiiñ magar kahīñ bhī dhuāñ nahīñ thā

charāġh kī thartharātī lau meñ har os-qatre meñ har kiran meñ

tumhārī āñkheñ kahāñ nahīñ thiiñ tumhārā chehra kahāñ nahīñ thā

dayār-e-hijrāñ kī vahshatoñ kā tilism TuuTā to maiñ ne jaanā

har ek dastak havāoñ meñ thī makīñ nahīñ the makāñ nahīñ thā

vo ek lamha thā sarḳhushī kā fusūñ thā daryāft ke safar kā

jo reg-e-jāñ meñ chamak rahā thā sitāra-e-āsmāñ nahīñ thā

vo kaisā mausam thā zard shāḳhoñ se sabz beleñ lipaT rahī thiiñ

vo sabz beleñ ki jin kī āñkhoñ meñ koī ḳhauf-e-ḳhizāñ nahīñ thā

yugoñ ke rath par savār gahrī ḳhamoshiyoñ ne batāyā mujh ko

ki tum se pahle bhī aur pahle bhī bas yaqīñ thā gumāñ nahīñ thā

usī zamīñ kī tahoñ meñ bahtā thā mīThe paanī kā ek chashma

sarāb-zādoñ kī tishnagī ko magar kuchh is kā gumāñ nahīñ thā

zamin aankhon ko mal rahi thi hawa ka koi nishan nahin tha

tamam samten sulag rahi thin magar kahin bhi dhuan nahin tha

charagh ki thartharaati lau mein har os-qatre mein har kiran mein

tumhaari aankhen kahan nahin thin tumhaara chehra kahan nahin tha

dayar-e-hijran ki wahshaton ka tilism TuTa to main ne jaana

har ek dastak hawaon mein thi makin nahin the makan nahin tha

wo ek lamha tha sarKHushi ka fusun tha daryaft ke safar ka

jo reg-e-jaan mein chamak raha tha sitara-e-asman nahin tha

wo kaisa mausam tha zard shaKHon se sabz belen lipaT rahi thin

wo sabz belen ki jin ki aankhon mein koi KHauf-e-KHizan nahin tha

yugon ke rath par sawar gahri KHamoshiyon ne bataya mujh ko

ki tum se pahle bhi aur pahle bhi bas yaqin tha guman nahin tha

usi zamin ki tahon mein bahta tha miThe pani ka ek chashma

sarab-zadon ki tishnagi ko magar kuchh is ka guman nahin tha