zamin bichha ke alag aasman banaun koi

zamīñ bichhā ke alag āsmāñ banā.ūñ koī

zamāñ makāñ se pare ab jahāñ banā.ūñ koī

tamām umr chale mere saath tanhā.ī

ġharaz hī kyā hai mujhe kārvāñ banā.ūñ koī

kisī ḳhushī ko nahīñ hai agar sabāt yahāñ

maiñ sochtā huuñ ki ġham jāvedāñ banā.ūñ koī

ye dasht-e-dil ki jahāñ ret uḌtī hai shab o roz

tire liye yahīñ mauj-e-ravāñ banā.ūñ koī

jo aisī vahshat-e-jāñ hai sar-e-yaqīn-o-sabāt

so kyuuñ na vahm tarāshūñ gumāñ banā.ūñ koī

Thaharnā kab hai mujhe reg-zār-e-duniyā meñ

so kyā paḌī hai yahāñ āstāñ banā.ūñ koī

zamin bichha ke alag aasman banaun koi

zaman makan se pare ab jahan banaun koi

tamam umr chale mere sath tanhai

gharaz hi kya hai mujhe karwan banaun koi

kisi KHushi ko nahin hai agar sabaat yahan

main sochta hun ki gham jawedan banaun koi

ye dasht-e-dil ki jahan ret uDti hai shab o roz

tere liye yahin mauj-e-rawan banaun koi

jo aisi wahshat-e-jaan hai sar-e-yaqin-o-sabaat

so kyun na wahm tarashun guman banaun koi

Thaharna kab hai mujhe reg-zar-e-duniya mein

so kya paDi hai yahan aastan banaun koi