zamin chhini kabhi aasman chhin liya

zamīn chhīnī kabhī āsmān chhīn liyā

tumhāre shahr ne merā jahān chhīn liyā

ḳhizāñ kī dhuup kā kis se kare gila gulshan

ki bāġhbāñ ne hī jab sā.ebān chhīn liyā

rahā na kar mujhe sayyād shal haiñ ye baazū

tire qafas ne mirā āsmān chhīn liyā

shab-e-firāq ye kitnī tavīl hai yā-rab

ki bāñg-e-murġh se shauq-e-azān chhīn liyā

ye kis asīr-e-salāsil kī lab-kushā.ī ne

amīr-e-vaqt se zor-e-bayān chhīn liyā

jise makāñ meñ basāyā thā ham ne kal 'mohkam'

usī ne aaj hamārā makān chhīn liyā

zamin chhini kabhi aasman chhin liya

tumhaare shahr ne mera jahan chhin liya

KHizan ki dhup ka kis se kare gila gulshan

ki baghban ne hi jab saeban chhin liya

raha na kar mujhe sayyaad shal hain ye bazu

tere qafas ne mera aasman chhin liya

shab-e-firaq ye kitni tawil hai ya-rab

ki bang-e-murgh se shauq-e-azan chhin liya

ye kis asir-e-salasil ki lab-kushai ne

amir-e-waqt se zor-e-bayan chhin liya

jise makan mein basaya tha hum ne kal 'mohkam'

usi ne aaj hamara makan chhin liya