zamin chiKH rahi hai ki aasman gira

zamīn chīḳh rahī hai ki āsmān girā

ye kaisā bojh hamāre badan pe aan girā

bahut sambhāl ke rakh be-sabāt lamhoñ ko

zarā jo sankī havā ret kā makān girā

is ā.īne hī meñ logoñ ne ḳhud ko pahchānā

bhalā huā ki maiñ chehroñ ke darmiyān girā

rafīq-e-samt-e-safar hogī jo havā hogī

ye soch kar na safīne kā bādbān girā

maiñ apne ahd kī ye tāzgī kahāñ le jā.ūñ

ik ek lafz qalam se lahūluhān girā

qarīb o duur koī shola-e-navā bhī nahīñ

ye kin andheroñ meñ hāthoñ se sham.a-dān girā

'fazā' ko toḌ to pheñkā havāoñ ne lekin

ye phuul apnī hī shāḳhoñ ke darmiyān girā

zamin chiKH rahi hai ki aasman gira

ye kaisa bojh hamare badan pe aan gira

bahut sambhaal ke rakh be-sabaat lamhon ko

zara jo sanki hawa ret ka makan gira

is aaine hi mein logon ne KHud ko pahchana

bhala hua ki main chehron ke darmiyan gira

rafiq-e-samt-e-safar hogi jo hawa hogi

ye soch kar na safine ka baadban gira

main apne ahd ki ye tazgi kahan le jaun

ek ek lafz qalam se lahuluhan gira

qarib o dur koi shola-e-nawa bhi nahin

ye kin andheron mein hathon se shama-dan gira

'faza' ko toD to phenka hawaon ne lekin

ye phul apni hi shaKHon ke darmiyan gira