zamin dega magar aasman mangega

zamīn degā magar āsmān māñgegā

mire vajūd se vo sā.ebān māñgegā

maiñ chand pal jo use thoḌā aasrā de duuñ

phir umr-bhar ke liye kul jahān māñgegā

vo jāntā hai nishāna achūk hai merā

vo mujh se TuuTī huī bhī kamān māñgegā

har ek gaam pe tū ne kiyā hai qatl mirā

tū kitnī daf.a mirī aur jaan māñgegā

tirī zabān meñ tujh ko javāb duuñ maiñ agar

hisāb mujh se mirā ḳhāndān māñgegā

maiñ jāntī huuñ sar-e-bazm aa.egā vo aur

mirā javāb usī darmiyān māñgegā

agar vo jaan bhī māñge ḳhushī ḳhushī de duuñ

magar vo kuchh bhī kahāñ be-zabān māñgegā

zamin dega magar aasman mangega

mere wajud se wo saeban mangega

main chand pal jo use thoDa aasra de dun

phir umr-bhar ke liye kul jahan mangega

wo jaanta hai nishana achuk hai mera

wo mujh se TuTi hui bhi kaman mangega

har ek gam pe tu ne kiya hai qatl mera

tu kitni dafa meri aur jaan mangega

teri zaban mein tujh ko jawab dun main agar

hisab mujh se mera KHandan mangega

main jaanti hun sar-e-bazm aaega wo aur

mera jawab usi darmiyan mangega

agar wo jaan bhi mange KHushi KHushi de dun

magar wo kuchh bhi kahan be-zaban mangega