zamin-e-dil pe tere nain naqsh ubhaarenge

zamīn-e-dil pe tire nain naqsh ubhāreñge

ki ghup añdheroñ meñ ham raushnī utāreñge

vo shaḳhs shīsha-badan hai so ehtiyātan ham

use chhueñge nahīñ duur se nihāreñge

ajiib hai na galā baiThne ke baa'd āḳhir

ye tai kiyā hai use ab nahīñ pukāreñge

ham āñsūoñ se tire pair dho.eñge aur phir

charāġh-e-dil se tirī aartī utāreñge

ise to qabr kī miTTī meñ vasl honā hai

so ham badan ko nahīñ ruuh ko sañvāreñge

maiñ un ko ḳhair kī jānib bulā rahā huuñ magar

ye shimr-zāde haiñ merā hī sar utāreñge

adālatoñ meñ jo raushan the munsifī ke charāġh

kise ḳhabar thī ki vo tīrgī se hāreñge

zamin-e-dil pe tere nain naqsh ubhaarenge

ki ghup andheron mein hum raushni utarenge

wo shaKHs shisha-badan hai so ehtiyatan hum

use chhuenge nahin dur se nihaarenge

ajib hai na gala baiThne ke ba'd aaKHir

ye tai kiya hai use ab nahin pukarenge

hum aansuon se tere pair dhoenge aur phir

charagh-e-dil se teri aarti utarenge

ise to qabr ki miTTi mein wasl hona hai

so hum badan ko nahin ruh ko sanwarenge

main un ko KHair ki jaanib bula raha hun magar

ye shimr-zade hain mera hi sar utarenge

adalaton mein jo raushan the munsifi ke charagh

kise KHabar thi ki wo tirgi se haarenge