zamin-e-fikr mein lafzon ke jangal chhoD jaana

zamīn-e-fikr meñ lafzoñ ke jañgal chhoḌ jaanā

ġhazal meñ apnī koī sher mohmal chhoḌ jaanā

haiñ nā-mānūs abhī karb-e-tamāshā se nigāheñ

dayār-e-jāñ meñ āshob-e-musalsal chhoḌ jaanā

nazar aa.eñ kabhī tahrīr meñ be-rabt fiqre

kabhī peshānī-e-tanqīd pe bal chhoḌ jaanā

baḌī mushkil se hotā hai koī darvesh-ḳhaslat

miyāñ āsāñ nahīñ kamḳhvāb-o-maḳhmal chhoḌ jaanā

ki raas aatā nahīñ āñkhoñ ko ab sho.aloñ kā mausam

havāoñ is taraf bhī lā ke bādal chhoḌ jaanā

'mubārak' bas yahī ik āḳhirī ḳhvāhish hai apnī

jo mujh ko qatl karnā ho to maqtal chhoḌ jaanā

zamin-e-fikr mein lafzon ke jangal chhoD jaana

ghazal mein apni koi sher mohmal chhoD jaana

hain na-manus abhi karb-e-tamasha se nigahen

dayar-e-jaan mein aashob-e-musalsal chhoD jaana

nazar aaen kabhi tahrir mein be-rabt fiqre

kabhi peshani-e-tanqid pe bal chhoD jaana

baDi mushkil se hota hai koi darwesh-KHaslat

miyan aasan nahin kamKHwab-o-maKHmal chhoD jaana

ki ras aata nahin aankhon ko ab shoalon ka mausam

hawaon is taraf bhi la ke baadal chhoD jaana

'mubarak' bas yahi ek aaKHiri KHwahish hai apni

jo mujh ko qatl karna ho to maqtal chhoD jaana