zamin-e-ishq pe ai abr-e-eatibar baras

zamīn-e-ishq pe ai abr-e-e.atibār baras

visāl-e-yār kā bah jaa.e intizār baras

sharāb-e-shauq kahīñ mujh ko kar na de mad.hosh

tirī tarī se utar jaa.e ye ḳhumār baras

mire habīb ko de duuñ vafā kā ik motī

khulā hai dil kā sadaf aa bas ek baar baras

pa.e numūd na garmī hai ishq kī na havā

daraḳht ziist ke haiñ ḳhushk barg-o-bār baras

kahīñ najāt kā dariyā na sūkhne lag jaa.e

chalā kare mirī kashtī kā kārobār baras

zamīn-e-dil meñ ugī hai anā kī fasl na.ī

tabāh kar de diyā maiñ ne iḳhtiyār baras

kahīñ unheñ na ho ḳhanda-labī pe vahm-o-gumāñ

dikhā de bekasī ai chashm-e-be-qarār baras

vo ek pal jo tire ishtiyāq meñ guzrā

us ek pal meñ simaT aa.e haiñ hazār baras

tire barasne se paanī hai qalb dushman kā

amal ye nek hai 'tamjīd' baar baar baras

zamin-e-ishq pe ai abr-e-eatibar baras

visal-e-yar ka bah jae intizar baras

sharab-e-shauq kahin mujh ko kar na de madhosh

teri tari se utar jae ye KHumar baras

mere habib ko de dun wafa ka ek moti

khula hai dil ka sadaf aa bas ek bar baras

pae numud na garmi hai ishq ki na hawa

daraKHt zist ke hain KHushk barg-o-bar baras

kahin najat ka dariya na sukhne lag jae

chala kare meri kashti ka karobar baras

zamin-e-dil mein ugi hai ana ki fasl nai

tabah kar de diya main ne iKHtiyar baras

kahin unhen na ho KHanda-labi pe wahm-o-guman

dikha de bekasi ai chashm-e-be-qarar baras

wo ek pal jo tere ishtiyaq mein guzra

us ek pal mein simaT aae hain hazar baras

tere barasne se pani hai qalb dushman ka

amal ye nek hai 'tamjid' bar bar baras