zamin ghubar samundar sahab apni jagah

zamīñ ġhubār samundar sahāb apnī jagah

magar maiñ aur mirā iztirāb apnī jagah

havā kī zad meñ hai har chiiz ḳhār-o-ḳhas kī tarah

kaho paḌe raheñ chup-chāp ḳhvāb apnī jagah

agarche bikhrī hai raakh us kī mere chāroñ taraf

vo lamha ab bhī hai apnā javāb apnī jagah

mire aqab meñ hai āvāza-e-numū kī guuñj

hai dasht-e-jāñ kā safar kāmyāb apnī jagah

zabāñ ko detā hai ehsās-e-tishnagī se najāt

vo zā.iqa hai sukūt-e-sarāb apnī jagah

na jaane hogā kahāñ ḳhema-e-badan 'ishrat'

ki chhoḌne ko hai har ik tanāb apnī jagah

zamin ghubar samundar sahab apni jagah

magar main aur mera iztirab apni jagah

hawa ki zad mein hai har chiz KHar-o-KHas ki tarah

kaho paDe rahen chup-chap KHwab apni jagah

agarche bikhri hai rakh us ki mere chaaron taraf

wo lamha ab bhi hai apna jawab apni jagah

mere aqab mein hai aawaza-e-numu ki gunj

hai dasht-e-jaan ka safar kaamyab apni jagah

zaban ko deta hai ehsas-e-tishnagi se najat

wo zaiqa hai sukut-e-sarab apni jagah

na jaane hoga kahan KHema-e-badan 'ishrat'

ki chhoDne ko hai har ek tanab apni jagah