zamin ka rang wahi aasman ka rang wahi

zamīñ kā rañg vahī āsmāñ kā rañg vahī

vahī sabāhat-e-gul hai binā-e-sañg vahī

jo ḳhvāb ban nahīñ paayā thā merī āñkhoñ kā

Thahar gayā hai mire aa.ine pe zañg vahī

badan meñ aag lagāte hue duā ke haath

lahū meñ phuul khilātī huī umañg vahī

badalne vaalā hī ḳhud ko badal nahīñ paayā

vahī bahāne haiñ us ke haiñ uzr-e-lañg vahī

hazār sulh kā parcham buland kar dekho

magar zamīñ pe musallat rahegī jañg vahī

purānī vaz.a se aayā huuñ tere kūche meñ

badan maiñ zor vahī ruuh meñ tarañg vahī

kuchh aise Dhañg se tabdīl ho rahā hai vo

ki rah na jaa.e kisī marhale pe dañg vahī

vahī nagar vahī galiyāñ vahī makīñ 'sājid'

paḌī hai paañv meñ zanjīr-e-nām-o-nañg vahī

zamin ka rang wahi aasman ka rang wahi

wahi sabahat-e-gul hai bina-e-sang wahi

jo KHwab ban nahin paya tha meri aankhon ka

Thahar gaya hai mere aaine pe zang wahi

badan mein aag lagate hue dua ke hath

lahu mein phul khilati hui umang wahi

badalne wala hi KHud ko badal nahin paya

wahi bahane hain us ke hain uzr-e-lang wahi

hazar sulh ka parcham buland kar dekho

magar zamin pe musallat rahegi jang wahi

purani waza se aaya hun tere kuche mein

badan main zor wahi ruh mein tarang wahi

kuchh aise Dhang se tabdil ho raha hai wo

ki rah na jae kisi marhale pe dang wahi

wahi nagar wahi galiyan wahi makin 'sajid'

paDi hai panw mein zanjir-e-nam-o-nang wahi