zamin kahin bhi na thi chaar-su samundar tha

zamīñ kahīñ bhī na thī chār-sū samundar thā

kise dikhāte baḌā haul-nāk manzar thā

luḌhak ke merī taraf aa rahā thā ik patthar

phir ek aur phir ik aur baḌā sā patthar thā

fasīleñ dil kī girātā huā jo dar aayā

vo koī aur na thā ḳhvāhishoñ kā lashkar thā

bulā rahā thā koī chīḳh chīḳh kar mujh ko

kueñ meñ jhāñk ke dekhā to maiñ hī andar thā

bahut se haath ug aa.e the merī āñkhoñ meñ

har ek haath meñ ik nok-dār ḳhanjar thā

vo jañgaloñ meñ daraḳhtoñ pe kūdte phirnā

burā bahut thā magar aaj se to behtar thā

hamāre vāste 'alvī' ke sher kyā kam haiñ

chalo qubūl ki 'ġhālib' baḌā suḳhan-var thā

zamin kahin bhi na thi chaar-su samundar tha

kise dikhate baDa haul-nak manzar tha

luDhak ke meri taraf aa raha tha ek patthar

phir ek aur phir ek aur baDa sa patthar tha

fasilen dil ki giraata hua jo dar aaya

wo koi aur na tha KHwahishon ka lashkar tha

bula raha tha koi chiKH chiKH kar mujh ko

kuen mein jhank ke dekha to main hi andar tha

bahut se hath ug aae the meri aankhon mein

har ek hath mein ek nok-dar KHanjar tha

wo jangalon mein daraKHton pe kudte phirna

bura bahut tha magar aaj se to behtar tha

hamare waste 'alwi' ke sher kya kam hain

chalo qubul ki 'ghaalib' baDa suKHan-war tha