zamin kahin hai meri aur aasman kahin

zamīñ kahīñ hai mirī aur āsmān kahīñ

bhaTak rahā huuñ ḳhalāoñ ke darmiyān kahīñ

mirā junūñ hī mirā āḳhirī ta.āruf hai

maiñ chhoḌ aayā huuñ apnā har ik nishān kahīñ

isī liye maiñ rivāyat se munharif na huā

ki chhoḌ de na mujhe merā ḳhāndān kahīñ

likhī ga.ī hai mirī fard-e-jurm aur jagah

liye ga.e haiñ gavāhān ke bayān kahīñ

havā-e-tund se laḌnā mirī jibillat hai

Dubo hī de na mujhe ye mirī uḌaan kahīñ

dil-e-hazīñ kā ajab haal hai mohabbat meñ

koī ġhazab hī na Dhā de ye nā-tavān kahīñ

maiñ dāstān-e-mohabbat ise sunā aayā

kahīñ kā zikr thā lekin kiyā bayān kahīñ

havā-e-shahr tujhe raas hī nahīñ 'āsif'

misāl-e-qais tū sahrā meñ ḳhaak chhān kahīñ

zamin kahin hai meri aur aasman kahin

bhaTak raha hun KHalaon ke darmiyan kahin

mera junun hi mera aaKHiri taaruf hai

main chhoD aaya hun apna har ek nishan kahin

isi liye main riwayat se munharif na hua

ki chhoD de na mujhe mera KHandan kahin

likhi gai hai meri fard-e-jurm aur jagah

liye gae hain gawahan ke bayan kahin

hawa-e-tund se laDna meri jibillat hai

Dubo hi de na mujhe ye meri uDan kahin

dil-e-hazin ka ajab haal hai mohabbat mein

koi ghazab hi na Dha de ye na-tawan kahin

main dastan-e-mohabbat ise suna aaya

kahin ka zikr tha lekin kiya bayan kahin

hawa-e-shahr tujhe ras hi nahin 'asif'

misal-e-qais tu sahra mein KHak chhan kahin