zamin kaisi thi kaisa aasman tha

zamīñ kaisī thī kaisā āsmāñ thā

nahīñ ma.alūm mujh ko maiñ kahāñ thā

nishāñ manzil kā koī kaise DhūñDe

ki tā-hadd-e-nazar phailā dhuāñ thā

vo mausam lauT kar āye.gā ik din

abhī tak mere dil meñ ye gumāñ thā

bhaḌak uThtā thā kyā rah rah ke jaane

ki merā dil to ik ātish-fishāñ thā

achānak bhuul kar pahuñchā jahāñ maiñ

vo sach-much mere sapnoñ kā jahāñ thā

adālat kyā mujhe insāf detī

ki jhūTā jab gavāhoñ kā bayāñ thā

hasīñ thī 'rāj' duniyā kī har ik shai

ki jab tak dil kā har jazba javāñ thā

zamin kaisi thi kaisa aasman tha

nahin malum mujh ko main kahan tha

nishan manzil ka koi kaise DhunDe

ki ta-hadd-e-nazar phaila dhuan tha

wo mausam lauT kar aayega ek din

abhi tak mere dil mein ye guman tha

bhaDak uThta tha kya rah rah ke jaane

ki mera dil to ek aatish-fishan tha

achanak bhul kar pahuncha jahan main

wo sach-much mere sapnon ka jahan tha

adalat kya mujhe insaf deti

ki jhuTa jab gawahon ka bayan tha

hasin thi 'raj' duniya ki har ek shai

ki jab tak dil ka har jazba jawan tha