zamin ke hath yun apna shikanja kas rahe the

zamīñ ke haath yuuñ apnā shikanja kas rahe the

sutūñ saare mahal ke rafta rafta dhañs rahe the

umīdeñ lamha lamha ghaT ke martī jā rahī thiiñ

ajab aaseb se aa kar diloñ meñ bas rahe the

shajar pe zahr ne ab rañg dikhlāyā hai apnā

rutoñ ke saañp yuuñ to muddatoñ se Das rahe the

mirā sūraj mirī āñkhoñ ke aage bujh rahā thā

mire saa.e mirī be-chārgī pe hañs rahe the

paḌe haiñ vaqt kī choToñ se ab mismār ho kar

vahī patthar jo apne daur meñ pāras rahe the

ujāḌā kis tarah āñdhī ne bedardī se dekho

nagar ḳhvāboñ ke kitnī hasratoñ se bas rahe the

uḌānoñ ne kiyā thā is qadar māyūs un ko

thake-hāre parinde jaal meñ ḳhud phañs rahe the

zamin ke hath yun apna shikanja kas rahe the

sutun sare mahal ke rafta rafta dhans rahe the

umiden lamha lamha ghaT ke marti ja rahi thin

ajab aaseb se aa kar dilon mein bas rahe the

shajar pe zahr ne ab rang dikhlaya hai apna

ruton ke sanp yun to muddaton se Das rahe the

mera suraj meri aankhon ke aage bujh raha tha

mere sae meri be-chaargi pe hans rahe the

paDe hain waqt ki choTon se ab mismar ho kar

wahi patthar jo apne daur mein paras rahe the

ujaDa kis tarah aandhi ne bedardi se dekho

nagar KHwabon ke kitni hasraton se bas rahe the

uDanon ne kiya tha is qadar mayus un ko

thake-haare parinde jal mein KHud phans rahe the