زمیں خموش ہے یہ آسماں بجھا ہوا ہے

زمیں خموش ہے یہ آسماں بجھا ہوا ہے

یہ لگ رہا ہے کہیں کوئی حادثہ ہوا ہے

ہر ایک شب میں یہی سوچتا ہوں برسوں سے

فلک کے بام پہ یہ چاند کیوں رکھا ہوا ہے

یہ روشنی ہے جو چہرے پہ تو نے بخشی ہے

لبوں پہ ہے جو تبسم ترا دیا ہوا ہے

بتا رہا ہے کہانی گزشتہ برسوں کی

ہر ایک رنگ جو تصویر سے اڑا ہوا ہے

سخن وری سے بھلے اور کچھ نہ ہو لیکن

ہم ایسے کتنے اکیلوں کا دل لگا ہوا ہے

یہ آج کیا ہوا عجلت میں رہتا تھا جو شخص

ترے خیال میں اک عمر سے رکا ہوا ہے