zamin ki god mein baiTha humak raha hun main

zamīñ kī god meñ baiThā humak rahā huuñ maiñ

falak pe chāñd kī jānib lapak rahā huuñ maiñ

nahīñ hai apnī zamīñ kī koī ḳhabar lekin

ḳhalā meñ duur kisī shai ko tak rahā huuñ maiñ

nahā gayā huuñ ḳhud apne lahū meñ sar-tā-pā

junūñ kī aag meñ lekin dahak rahā huuñ maiñ

agarche zulmat-e-shab meñ kamī nahīñ aa.ī

misāl-e-māh-e-daraḳhshāñ chamak rahā huuñ maiñ

har ek samt badaltī rutoñ kā mātam hai

shagufta ġhunche kī sūrat chaTak rahā huuñ maiñ

parakhne vaale mujhe dekh is tarah bhī zarā

agar hai khoT to kaise chamak rahā huuñ maiñ

girī hī jaatī hai dīvār-e-girya har lahza

kisī kī aañkh se shāyad Dhalak rahā huuñ maiñ

tamām shahr ne dīdār kar liyā 'kausar'

ab apnī laash ke chehre ko Dhak rahā huuñ maiñ

zamin ki god mein baiTha humak raha hun main

falak pe chand ki jaanib lapak raha hun main

nahin hai apni zamin ki koi KHabar lekin

KHala mein dur kisi shai ko tak raha hun main

naha gaya hun KHud apne lahu mein sar-ta-pa

junun ki aag mein lekin dahak raha hun main

agarche zulmat-e-shab mein kami nahin aai

misal-e-mah-e-daraKHshan chamak raha hun main

har ek samt badalti ruton ka matam hai

shagufta ghunche ki surat chaTak raha hun main

parakhne wale mujhe dekh is tarah bhi zara

agar hai khoT to kaise chamak raha hun main

giri hi jati hai diwar-e-girya har lahza

kisi ki aankh se shayad Dhalak raha hun main

tamam shahr ne didar kar liya 'kausar'

ab apni lash ke chehre ko Dhak raha hun main