zamin ki kokh se lage hain kan us pahaD par

zamīn kī kokh se lage haiñ kaan us pahāḌ par

ye kaun de rahā hai yuuñ azaan us pahāḌ par

chahak rahī haiñ bulbuleñ bhī ḳhāmushī ke peḌ par

uThā rahī haiñ sar pe āsmān us pahāḌ par

havā.eñ tāza-kār haiñ añdherā laal laal hai

diye kī laḌkhaḌātī hai zabān us pahāḌ par

na TūTeñ āftāb se na chhūTeñ intiḳhāb se

sunā rahī haiñ kirneñ dāstān us pahāḌ par

ridā-e-shām-e-ġham kī vo farokashī hai dīdanī

navā-e-sub.h kā hai pāsbān us pahāḌ par

ḳhamīda āsmāñ ḳhajista gaam lau bahār kī

sitāda choTiyoñ kā ik jahān us pahāḌ par

udhar hai buuñd buuñd sho.ala-rez āb-e-chashm kī

idhar nazar nazar lahūluhān us pahāḌ par

ḳhalish sitāroñ meñ hai kyā sharar sharar hai sar-fishāñ

bhaḌak rahā hai koī āshiyān us pahāḌ par

taḌap rahī hai yuuñ fazā shajar shajar hai mast-e-raqs

junūñ kā ho rahā hai imtihān us pahāḌ par

hayūlā dard-e-ishq kā supurd-e-ḳhāk ho na ho

taḌapne kā mujhe bhī hai gumān us pahāḌ par

qalam qalam na ho qalam se rang sūratoñ meñ bhar

karūñgā lafz lafz hirz-e-jān us pahāḌ par

zamin ki kokh se lage hain kan us pahaD par

ye kaun de raha hai yun azan us pahaD par

chahak rahi hain bulbulen bhi KHamushi ke peD par

uTha rahi hain sar pe aasman us pahaD par

hawaen taza-kar hain andhera lal lal hai

diye ki laDkhaDati hai zaban us pahaD par

na TuTen aaftab se na chhuTen intiKHab se

suna rahi hain kirnen dastan us pahaD par

rida-e-sham-e-gham ki wo farokashi hai didani

nawa-e-subh ka hai pasban us pahaD par

KHamida aasman KHajista gam lau bahaar ki

sitada choTiyon ka ek jahan us pahaD par

udhar hai bund bund shoala-rez aab-e-chashm ki

idhar nazar nazar lahuluhan us pahaD par

KHalish sitaron mein hai kya sharar sharar hai sar-fishan

bhaDak raha hai koi aashiyan us pahaD par

taDap rahi hai yun faza shajar shajar hai mast-e-raqs

junun ka ho raha hai imtihan us pahaD par

hayula dard-e-ishq ka supurd-e-KHak ho na ho

taDapne ka mujhe bhi hai guman us pahaD par

qalam qalam na ho qalam se rang suraton mein bhar

karunga lafz lafz hirz-e-jaan us pahaD par