زمیں کی کوکھ سے سورج اگا کے دیکھا ہے

زمیں کی کوکھ سے سورج اگا کے دیکھا ہے

کبھی ستاروں کی دنیا میں جا کے دیکھا ہے

جو بے وفائی کی فطرت ہے جا نہیں سکتی

گلے کا ہار بھی اس کو بنا کے دیکھا ہے

ضرور دل پہ لگائے گا کوئی ضرب مرے

خدا ہی جانے کہ کیوں مسکرا کے دیکھا ہے

کسی کے اشک نہ چھلکے نہ کوئی پاس آیا

جنازہ میں نے خود اپنا اٹھا کے دیکھا ہے

اسی لئے تو نظر آئے مجھ سے سب بالا

غرور و کبر کی دیوار ڈھا کے دیکھا ہے

ہر ایک عضو بدن اس کا ہے مثالی شادؔ

قریب رہ کے بہت دل ربا کے دیکھا ہے